رواية لعبه القلوب المحرمه الفصل 24 بقلم امانى سيد

قابل شعيب شرين وخرجوا فى مطعم وفضلوا يتكلموا بس كانت قاعده خاليه من المشاعر حاول شعيب فيها إنه يقرب من شرين او يعيش العالم بتاعها يمكن يحبها أو يتشدلها
فتح معاها مواضيع عن حياتها الشخصيه حس وقتها إنه بيبعد عنها اكتر قرر انه يقضى اليوم كله معاها يمكن يلاقى حاجه مكنش شايفها قبل كده 
بقولك يا شرين تحبى نخرج نروح فين 
إيه رايك فى السينما 
مافيهاش افلام حلوه دلوقتي 
عندك حق طيب انت في دماغك حاجه معينه عايزنا نروحها 
لا انا النهارده فضيت نفسي عشانك شوفي انتى عايزه تروحي فين وانا معاكي 
إيه رايك نعمل شوبينج 
مش بفهم انا في الحاجات دي انا مش بتعامل غير مع محل واحد بس 
ايه ده بجد لا انا مش كده خالص انا بحب الف براحتي واتفرج على اللي يعجبني واشتريه 
هاجي معاكي يا ستي وامري لله 
خرج شعيب مع شرين وبدأت شرين تتصرف بتلقائيه
حسست شعيب أكتر بالملل 
انتهت من الشوبينج ودخلت محل مجوهرات واشترى ليها شعيب خاتم هديه 
فى نفس الوقت كانوا صفا ومروه بيتمشوا فى نفس المول وبيتفرجوا على المحلات 
تفتكرى يا مروه ممكن يجيى علينا اليوم اللى ندخل فيه محل من المحلات دى ونشترى زى الناس اللى معاها فلوس دى
ضحكت مروه على احلام اختها وشاورت على محل دهب
شايفه محل الدهب ده انا اتحرج بس اعدى من جمبه مش اشترى منه الناس دى بينا وبينهم سنين ضوئيه 
وهى بتشاور على المحل اتفاجئت بوجود شعيب وشرين جوه المحل 
فضلت بصالهم من بعيد وقبلها بيوجعها هى أه تعرف انهم مخطوبين لكن وجودهم مع بعض بالشكل ده ۏجعها هى عاشت فى حلم بعيد صعب المنال 
هى حبته ماتنكرش انهة حبته وللأسف القلب مش عليه سلطان 
اخدت صفا بالها من نظرات مروه وفهمت ايه بيدور جواها 
يلا يا ستى نمشى نكمل فرجه واقولك على فكره احنا ندخل اغلى محل نقؤس احلى واغلى فستان ونصوره وننزل نفصل زيه ها ايه رايك وماما ايه فى التفصيل ممتازه بفكر نتعلم منها 
خلصت كلامها وشدتها وفعلا دخلوا اتفرجوا على باقى المحلات وكل واحده اختارت موديل فستان قررت أنها تفصله 
شوفتى بقى ادينا هنلبس اغلى البرندات بأرخص الاسعار الحياه محتاجه إنك تفكرى بشكل اذكى ومجهود اقل 
طيب انا كنت عايزه اشترى بنطلون وجزمه ها يا نبغه هنفصلهم كمان 
لأ يا ستى البناطيل مافيش أكتر منها والجزم ماليه الرصيف 
وفعلا اخدتها صفا واشتروا كل اللى محتاجينه وقدرت تنسيها شعيب واللى شافته حاولت مروه تتجاهل مشاعرها وتمشى ورا صفا يمكن تقدر تنسى 
عن شعيب كمل اليوم مع شرين واخدها وقاعدوا فى كافتريا حاول كتير يفهمها يقرب من تفكيرها لكن الفارق بينهم كبير 
هى كل دماغها فى فرح وسفر وشوبينج معندهاش مشاكل فى حياتها ....