رواية مارد وكنزي الفصل الأخير

عرفوا!
... برضو مافهمتش عايز ايه
نفخ بضيق ... نتجوز يا كنزي! أنا بجد زهقت
بصت له باعتراض ... لا طبعا لسة بدري أوي ع حكاية الجواز
... ليه هو احنا اول مرة نعرف بعض! هي مش الخطوبة معمولة للتعارف!
... مهو احنا بنتعرف أهو
بضيق ... بطلي برودك دة! احنا بنتعرف من يوم جوازنا اللي عدى عليه اكتر من 6 شهور كل دة ما كفاكيش
ببلاهة ... بصراحة لأ
بضيق ... كنزي!
... بص يا أمان احنا نخليها 6 شهور عشان نمسك العصاية من النص وأهو برضو ممكن اكتشف فيك حاجات جديدة مانت بتبهرني
بتهكم ... ست شهور أه! لا خليها 6 سنين أحسن بقولك ايه! أنا ماشي
خرج من البلكونة وماشي ع برة وسعاد شافته
... ايه يا مارد يابني رايح فين
بحنق ... ماشي عشان بنت سيادتك عايزة خطوبتنا تبقى 6 شهور ما كفاهاش المرمطة السودة اللي عملتها فيا...
بص لكنزي ورفع صباعه بتحذير ... والله العظيم يا كنزي أنا قادر أكرهك فيا ودلعك الأوفر اللي سايقاه عليا دة هقلبه عليكي وساعتها هتقولي يا ريت اللي جرا ما كان .. سلام
شوح بإيده بضيق وقفل الباب وراه ... سعاد مسكت دراع كنزي بضيق
... انتي هتتنططي ع الراجل يا روح امك اكمنه ماشي ورا دماغك الهبلة دي
پألم ... أه ياما ف ايه! هو انا عملت حاجة!
... وكسة توكسك زهقتي الراجل ف عيشته وتقولي عملت حاجة.. يا بت يا هبلة انتي فاهمة الدلع غلط الراجل لو شاف اللي بيحبها بتتنمرد عليه بيكرهها وما بيعبرهاش
... بس انا بقا سمعت مثل بيقول ان الولد زي طابع البوسطة تتفي عليه يلزق أكتر
سعاد بحنق ... لا دة شكلي انا اللي هتف.. غوري جاتك القرف
شوحت بإيدها ودخلت اوضتها تتصل بمارد اللي مشي زعلان منها
بضيق ... نعم عايزة ايه
بزمجرة ... هو انا بشحت منك ياض انت
... لا بس بقيتي بايخة أوي
بنبرة هادية ... متزعلش طيب انت عارف انك غالي عندي ومش بقدر أزعلك
بسخرية ... لا مهو واضح
برقة ... خلاص بقا يا مانو ما تبقاش قفوش كدة
... الاسبوع الجاي فرحنا يا كنزي!
بارتباك ... انت مستعجل كدة ليه
... حقي عاوزك معايا ولو سمحتي ما تعترضيش
بلعت ريقها بتوتر ... حاضر 
______
جه يوم المنتظر وكان نفس يوم فرح جاسم وديما.. كل واحدة من العرايس ف بيتها لأن كنزي أصرت تخرج عروسة من بيت أبوها وكل جيرانها وحبايبها يشوفوها ويشاركوها فرحتها
ريم دخلت الأوضة ... اتفضلي حضرتك فستانك جاهز!
كنزي ... بت يا ريم انتي مش ناوية تتجوزي ولا عايزة تعنسي
عدلت نضارتها وتمتمت بخفوت ... هستناكي تتطلقي الأول عشان أعرف اتجوز
سمعتها كنزي ورفعت سلاحھا المميز الشبشب وأطلقته عليها بس كانت خرجت وقفلت الباب وراها
... شالا حنش يلوشك يا بعيدة 
______
جه الليل والمفروض مارد رايح ياخد كنزي من بيت ابوها للقاعة.. جهز وخلص ولبس أشيك وأحلى بدلة وكان شكله مميز ومتناسق.. دخلت ميان ووراها أركان عنده وحضنوه بفرحة
ميان ... ألف مليون مبروك يا أبيه أنا فرحانه أوي
أركان ... ادعيله بالستر الليلة دي يا بنتي انتي ناسية ان العروسة كنزي!!
الاتنين ضحكوا ومارد ضربه بخفه
... بس يالا
ميان ... سيبك منه يا أبيه انت بجد شكلك يجنن
... دة انتي اللي قمر ايه الحلاوة دي! بس مش شايفة ان الفستان مفتوح شوية!!
... منا هلبس الطرحة ع دراعي
دخلت نرجس مع كمال وشافت ابنها عريس وسيم زي البدر
مسكت وشه وقالت بدموع الفرح... بسم الله ما شاء الله زي القمر يا حبيبي ربنا يحفظك
باس ايديها وحضنها بحب..