رواية شمس تتحدى الغيوم الفصل الخمسون بقلم عبير سليم

يصفي شغله فشرم
عليا ان شاء الله على خير ياحبيبتي
إيمان يارب ياحبيبتي
ثم تقف لتتحرك
هاله رايحه فين متستني شويه مستعجله ليه بس
إيمان سماح وحشتني حروح اغلس عليها شويه واحتمال ابات عندها الليلادي
عليا ههههههه حماتك
انا متكلمتش معاها بس الكلام اللي سمعته عنها خلاني نفسي اشوفها بجد
إيمان اللي يسمع غير اللي يشوف يالولو
حماتي دي نسخه واحده بس حاجه كده ملهاش حل ولا وصف تتكلم الكلام وزي مايطلع
وكله كوم وعلاقتها ببسمه بنتها كوم تاني خالص
عليا شخصيه مسليه
إيمان اذاعة الشرق الاوسط من القاهرة هههههههه عسل وسكر بصي تقعدي معاها تعرفي اخبار المنطقه والمناطق المجاورة مع مراعاة فروق التوقيت متشبعيش من قعدتها
انا لو قعدتك معاها بصي حتروحي معاها لآخر الدنيا وانتي مكانك
عليا ههههههه لا انا بجد نفسي اشوفها
إيمان بس كده من عينيه دي سموحه دي حبيبتي ياللا بقى انا حروحلها عشان عاوزاها فموصوع هام جدا
وده إيه الموضوع ده أن شاء الله
إيمان سماح صحصحي معايا كده وركزي ده بتعلق بمستقبل فتاة بريئه
سماح يالهوي حد ضحك عليها وحامل واللا ايه
إيمان انتي ايه اللي بتقوليه ده يادي النيله
سماح طب ماتقولي ياجذمه
ايمان لا مانا مش حتكلم غير لما تقومي من على سرير الولاده ده وتفكي الربطه اللي على راسك دي وتطلعي معايا برة
سماح مليش نفس ياايمان
إيمان ليه بس ياسموحتي ايه اللي مزعلك ياقمر
سماح الراجل المخفى اللى قدمت معاه فى العمرة شكله كده طلع نصاب
إيمان يالهوي نصاب
سماح وطي صوتك الله يحرقك انا مجبتش سيرة لحد
إيمان مجيبتيش سيرة لحد ازاي ماهما لازم كانوا حيعرفوا وبعدين هو انتي حتطلعي من غير محرم
سماح محرم مين هو انا بدور على عريس انا بلغت من العمر ارذله انا حطلع مع ام خالد وام مريم وام السيد جيراني اه مااحنا قلنا نروح مع بعض كده عشان نونس بعض
إيمان ودي حتبقى عمرة دي واللا رحلة القناطر الخيريه ده انتوا حتجيبوا سيرة لا اله الا الله والعمرة حتبوظ من وانتوا هناك
خدي معاكي عمي
سماح عمك اصلا مش بعيد اروح وارجع وهو نايم ولا حيحس اني مش فالبيت اصلا
إيمان يالهوي ليه ياموحه يعني انتوا مفيش حاجه كده ولا كده
سماح يااختي بلا وكسه ماخلاص شطبنا من زمان
إيمان ليه بس ياموحه طب ده انتي تنطقي الحجر بخفة دمك دي
سماح ربنا سادد نفسه نقول ايه بقى راجل فقري فوقتيني بعد ماكنت حنام ياجذمه قولي عاوزة ايه الله يحرقك
ايمان توفيق
سماح توفيق مين توفيق الدقن
إيمان توفيق الدقن مين
سماح اللي كان بيمثل مع اسماعيل يس و زى عود الكبريت ميولعش الا مرة واحده
إيمان ههههههههه هو ده اللي انتي فاكراه
سماح ايوة الباز افندي ساقط ابتدائيه
ماتخلصي يابت وقولي عاوزة ايه كنت حنام ياللى تنام عليكي حيطه
إيمان توفيق ابن اخوكي
سماح قطيعه تقطعه وتقطع سيرته ماله
إيمان جايباله عروسه
سماح عروسة مين دي اللي جايبهاله
إيمان لما تقوليلي كل حاجه عنه الأول
سماح نسخه من بسمه فى النكد يشمه من على بعد الف متر
وشه مبيضحكش فقري بس طيب وابن حلال وغلبان
بخيل ميهونش عليه القرش جلده بس نزيه يحب يلبس كويس وياكل كويس
عصبي وجعجاع بس يطلع وينزل على مفيش
عاوز امه تعملله كل انواع الاكل مع انه بياكل لقمتين ويقوم
ميخدمش حد ابدا لو قلتيله افقعلي عيني يقولك صوبعى بيوجعني
بس لو طلبت منه يعمللي مصلحه يعملهالي
لو حد طلب منه فلوس سلف يقول معييش منين لكن لو لقى حد غلبان يطلع من جيبه ويديه على طول
إيمان انتي حتشيلليني ياسماح انتي قلتي كل صفه وعكسها