رواية عهد الغرام الجزء الثالث أسيرة في مملكة عشقه الفصل العاشر 10بقلم سيليا البحيرى

أنا شايفه حد يروح يقيس حرارتها يمكن سخنت! 
إياد يضحك 
لا لا البنت أكيد واخدة جائزة نوبل ومش عايزة تقول! 
في تلك اللحظة تتوقف غزل عن الركض وتقف في وسط الصالة تضع يديها على رأسها وتأخذ نفسا عميقا ثم تصرخ بسعادة 
غزل بصوت عال 
شغف هتتجوز!!! 
يعم الصمت التام للحظة الجميع يحدق بها وكأنها تحدثهم بلغة غريبة.
عامر يهمس لرهف زوجته 
مين شغف دي 
رهف تضربه على ذراعه 
بنت عمي يا غبي صاحبة غزل! 
ميار مڤزوعة 
هو ده السبب اللي خلاكي تولعي الفيلا 
عادل جد غزل يضحك بخفة 
يا بنتي إحنا افتكرنا حاجة خطېرة حصلت! 
نادر يبتسم وهو يهز رأسه باستمتاع 
بس حلو إن الفرحة تفضل موجودة في البيت ده فرحة الشباب دي كنز! 
أما سليم ابن عم غزل فيرفع حاجبه بمزاح وهو ينظر لها 
سليم بضحكة خبيثة 
يا ترى فرحتك دي بسبب الجواز نفسه ولا بسبب أوس 
يحمر وجه غزل بسرعة فتلتفت نحوه پغضب وتقذفه بوسادة كانت على الكنبة 
غزل بحدة 
اسكت انت! أنت مالك 
يضحك الجميع على رد فعلها وتتحول الصالة إلى ضحكات وأحاديث عن الزفاف بينما تبقى غزل في عالمها الخاص تتخيل اللقاء المنتظر مع شغف وأوس
في صالة الرياضة مساء
تدوي أصوات الأوزان وهي ترتطم بالأرض والموسيقى الصاخبة تملأ المكان. في زاوية من الصالة يقف غيث ممسكا بالأوزان يرفعها ببطء لكن عينيه ليستا على المرآة أمامه بل شاردتان تماما وكأنه في عالم آخر.
مصطفى ينظر إليه وهو يرفع الأثقال بسهولة 
يا ابني إنت بتتمرن ولا بتتأمل شكلك بتكتب قصيدة غزل مش بتمارس رياضة! 
لا يرد غيث فقط يضع الأوزان على الأرض ويجلس على المقعد يمسح عرقه بمنشفة وهو لا يزال سارحا.
مصطفى يجلس بجانبه ويهزه بخفة 
غيث! غييييث! رجع من الكوكب اللي إنت فيه في إيه 
غيث بلا مبالاة لكنه يتنهد 
مفيش 
مصطفى يضع يده على ذقنه بتفكير ساخر 
مفيش مفيش إزاي بقى بقالك نص ساعة شايل الوزن بالعافية وكل شويه سرحان ومبتتكلمش! شكلها بنت! 
يشيح غيث بنظره بعيدا لكن ارتباكه يكشفه.
مصطفى يضربه على كتفه بمزاح 
ياااه وقعت يا معلم 
غيث يغمغم وهو يشبك يديه معا 
هي مش كده بس مش عارف كل ما أحاول أشغل دماغي بحاجة تانية ألاقي نفسي بفكر فيها في ضحكتها في عصبيتها حتى! 
مصطفى ينفجر ضاحكا 
يبقى وقعت رسمي يا روح أمك غيث اللي كان دايما يقول الحب تضييع وقت بقى شارد في واحدة!
غيث يتأفف ويحاول إخفاء ابتسامته 
اسكت بقى مفيش حاجة زي ما إنت متخيل. 
مصطفى يمط شفتيه بمكر 
آه طبعا مفيش حاجة وعلشان مفيش حاجة عايز تراهن إن أول حرف من اسمها غ 
يتوقف غيث للحظة ينظر إلى مصطفى بحدة لكنه لا يرد وهذا الصمت وحده كان إجابة كافية!
مصطفى يضحك ويقف ليكمل تمرينه 
خلاص يا صاحبي من النهاردة هناديك غيث العاشق ربنا يكون في عونك! 
أما غيث فيبتسم لنفسه وهو يمرر يده في شعره يفكر في غزل ويهمس لنفسه بصوت لا يسمعه سوى قلبه 
غزل إنت عملتي فيا إيه